分析師賺錢 唔係靠炒股

話說之前同工程部Dicky討論過買唔買阿里巴巴（09988），仲記得當時話如果阿里可以企穩50天綫，就可以挑戰100蚊大關，果然之後上試過100蚊關口，但之後就持續回落，曾經低見過78蚊水平。

曉陽當時估計，如果無其他後續動作，股價上升動力唔會好大，果然當時真係升一轉就回落。Dicky就話曉陽預測真係準確，厲害過唔少分析師。

現實係，曉陽並唔係咩分析師，純粹按照常理推斷。股價要上升，其實需要唔少動力配合，但市場已經缺乏炒作理由，所以股價受壓好正常。

Dicky就覺得曉陽咁厲害，一定賺唔少。其實準唔準，同賺錢係兩碼嘅事，如果預測準就賺錢，咁啲分析師咪賺好多？

其實大家喺坊間見到嘅分析員又好，評論員亦好，都唔會落場炒股，否則就要利益申報。咁佢哋點賺錢？其實主要靠3個途徑。

首先，現實世界中，每個人接觸嘅領域同接受嘅信息都非常有限，如果自己可以接收到比別人更多資訊，就能形成「信息差」，好多分析師就係比其他人睇更多資訊，從而賺取「信息差」帶嚟嘅錢。

第二樣係「認知」。「認知」就係一個人對事物嘅理解同認識，好多分析師都靠累積知識，從而了解行業運作，造就佢哋知道一般人唔認識嘅知識，於是就通過傳授知識獲取報酬。

最後一點係口碑，即係大家購買某一種物品需要考量嘅因素。當大眾對某種事物唔認識，而有一個專家出嚟同大家分析，必然會獲得更多信賴。

所以，分析師係咪炒股賺好多錢？其實不然，佢哋更多係通過自己嘅資訊同知識，從而獲取回報。

（本欄逢周四刊登）